दुबई, १३ जुलाई २०२५ – नेपाली राजदूतावास अबुधाबीको संरक्षकत्वमा, नेपाली समाज यूएई र गैरआवासीय नेपाली संघ (NRNA) यूएई को सहकार्यमा “श्रमिक सचेतना तथा सुरक्षित आप्रवासन सम्बन्धी संवाद कार्यक्रम – भाग २” दुबईको Club SK7 मा भव्य रूपमा सम्पन्न भयो। कार्यक्रमले यूएईमा कार्यरत नेपाली श्रमिकहरूलाई कानुनी, सामाजिक, वित्तीय तथा आप्रवासन सम्बन्धी महत्त्वपूर्ण जानकारी प्रदान गर्न उद्देश्य लिएको थियो।
कार्यक्रमको प्रमुख आकर्षण बन्न पुगेका श्रम कन्सुलर दिपेन्द्र पौडेलले सहभागीहरूको जिज्ञासाहरूमा एकदमै स्पष्ट, सजिलो र सम्मानजनक तरिकाले उत्तर दिनुभयो। उहाँको इमानदार जवाफ र सरल प्रस्तुतिले सहभागीहरूको मन जितेको देखियो।
“दूतावासले किन फोन उठाउँदैन?” भन्ने प्रश्नमा जवाफ दिँदै पौडेलले भने –
“आजभन्दा केही वर्षअगाडि ५०,००० नेपाली मात्र थिए, आज ७ लाखभन्दा बढी छन्। तर कर्मचारी संख्या भने त्यत्तिकै छ। यस्तो स्थितिमा पनि हामी सकेसम्म सबैलाई सेवा दिन प्रयासरत छौं।“
उहाँले थप्नुभयो कि हाल दूतावासमा आउने अधिकांश फोनहरू पासपोर्ट स्टाटस बुझ्नकै लागि हुने गर्दछन्, जुन जानकारी अनलाइन वा दूतावासको आधिकारिक सामाजिक सञ्जालबाट सहजै प्राप्त गर्न सकिन्छ।
श्रम स्वीकृति नवीकरण तथा नयाँ दर्ता प्रक्रिया आगामी श्रावण १ गतेदेखि सुरु हुने जानकारी पनि पौडेलले दिनुभयो। साथै, उहाँले थप गर्नु भयो कि यूएईमा कार्यरत नेपाली श्रमिकहरूका लागि तोकिएको नयाँ न्यूनतम तलब नियम लागू गर्न दूतावास सक्रिय रूपमा कार्यरत छ र यस अभियानमा सबै नेपाली संघ–संस्था तथा व्यक्तिहरूको सहयोग आवश्यक रहेको भन्दै समर्थनको आग्रह समेत गर्नुभयो। उहाँले यस विषयमा सम्पूर्ण नेपाली संघसंस्था तथा व्यक्तिहरूको सहयोगको आह्वान गर्नुभयो।
कार्यक्रममा दुबई प्रहरीको सहभागिता पनि उल्लेखनीय रह्यो। उहाँहरूले अहिलेको समयमा फेक पुलिस कल, कुरियर स्क्याम, र सामाजिक सञ्जालमार्फत हुने ठगीहरूका बारेमा जानकारी दिँदै भने –
“दुबई प्रहरीले कहिल्यै मोबाइल नम्बर वा सामाजिक सञ्जालबाट सम्पर्क गर्दैन।“ त्यस्ता सम्पर्कहरू पूर्णरूपमा ठगी हुने चेतावनी दिइयो।
कार्यक्रममा पत्रकार महासङ्घ यूएई शाखाका पूर्व अध्यक्ष लक्ष्मण खनालद्वारा सञ्चालित सामाजिक सञ्जाल सचेतना सत्र पनि उपयोगी रह्यो। उहाँले सामाजिक सञ्जालको सकारात्मक प्रयोग र गलत सूचनाबाट जोगिने उपायहरूबारे जानकारी दिनुभयो।
कार्यक्रमका विशेष अतिथि दुबईस्थित नेपाली महावाणिज्यदूत महामहिम हरि ओडारीले सहभागीहरूको बिन्दुहरूलाई सम्मानपूर्वक सम्बोधन गर्दै भन्नुभयो –
“यो हाम्रो टोलीका लागि सिकाइको अवसर रह्यो। दुबईमै सेवा विस्तार गर्न हामी गम्भीर तयारीमा छौं।“
त्यसैगरी, नेपाली राजदूत महामहिम तेजबहादुर क्षेत्रीले भन्नुभयो –
“दूतावास सधैं श्रमिकहरूको पक्षमा छ। तर केही व्यक्तिहरू वा समूहहरूले सामाजिक सञ्जालमा झूठा आरोप लगाउने र भ्रम सिर्जना गर्ने प्रयास गरिरहेका छन्। यस्ता नकारात्मक सोचलाई छाडौं र सकारात्मक सोच अपनाऔं।“
भावुक क्षण: जब दूतावासको ढोका हानिन्छ…
कार्यक्रमको सबैभन्दा हृदय छोएको क्षण त्यतिबेला थियो, जब श्रम कन्सुलर दिपेन्द्र पौडेलले पीडाभित्र लुकेको यथार्थ सुनाउँदै भने—
“केही नेपाली दाजुभाइहरू दूतावाससम्म आउँछन्, रिसको आवेगमा ढोका हान्छन्, केही नबोली फर्किन्छन्… हामी बुझ्छौं— उनीहरूलाई कस्तो पिरलो छ, कति गुनासो छ।”
उहाँको आँखामा पीडा थियो, तर आवाजमा गहिरो जिम्मेवारी। उहाँले थप्नुभयो—
“हामी सीमित स्रोत र जनशक्ति बीच काम गरिरहेका छौं। तर हाम्रो प्रयास सधैं एउटै हुन्छ— जो–कोही पनि दूतावास आउँछ, उसले आफ्नो काम सकेर फर्किन्छ। त्यसका लागि कहिलेकाहीँ हाम्रो स्टाफले बिहानदेखि बेलुकी अबेरसम्म काम गर्छन्, तर कोही खाली हात फर्कनु हुन्न।“
त्यो क्षण हल एकछिन मौन भयो। सरकारी सेवामा निष्ठा, व्यथा, अनि संघर्षको सजीव चित्र त्यो बोलीमा थियो। यो न त कुनै औपचारिक जवाफ थियो, न त बचाउ— यो थियो “हामी तपाईंका लागि हो” भन्ने सन्देश।
समीक्षा तथा प्रभाव:
यो कार्यक्रम कुनै औपचारिकता मात्र थिएन – सयौं श्रमिकहरूको आँखामा साँचिकै चेतना र आशा बोकेको संवाद थियो। सामाजिक सञ्जालमा केही व्यक्तिहरूले “बजेट सक्न गरियो” भन्ने आरोप लगाए पनि, वास्तविकता फरक थियो। Nepalese in UAE फेसबुक पेजमार्फत हजारौंले प्रत्यक्ष हेरे, सहभागीहरूले व्यक्तिगत प्रश्नहरू सोध्न पाए र विश्वसनीय उत्तर पाए।
कार्यक्रमले फेरि एकपटक देखायो – “एकता, समन्वय र सकारात्मक प्रयासले लाखौंको मन जित्न सकिन्छ।“
